Stafrænir heimar

Þrívíddarumhverfi opna nýjar leiðir til að skoða og kynna rými, hönnun og hugmyndir.

Með nákvæmri endurgerð og gagnvirkri framsetningu er hægt að skapa stafræna eftirlíkingu af byggingum og sýningum og nota þær í kynningar, fræðslu eða hönnunarvinnu. Þau geta verið hluti af hönnunarferli, sýndarúttektum og verkfræðilegri úrvinnslu. Með þeim má gera sýningar aðgengilegar á nýjum miðlum, bæta upplifun notenda og veita innsýn í mannvirki áður en þau verða að veruleika.

Perlan – Náttúrusafn

Við erum að þróa stafræna útgáfu af náttúrusýningu Perlunnar þar sem rými, sýningarmunir og frásagnir eru endurskapaðar í sýndarheimi.

Verkefnið miðar að því að gera náttúrufyrirbæri aðgengileg á nýjan hátt með gagnvirkri upplifun. Sýningin var kortlögð og út frá teikningum, hönnunarskjölum og ljósmyndum var byggt stafrænt umhverfi sem endurspeglar sýninguna í Perlunni.

Í stað uppstoppaðra dýra og kyrrstæðra sýningargripa birtast nú lifandi stafrænar útgáfur.  Áhersla var lögð á að halda efni sýningarinnar sem næst upprunalegu formi en nýta um leið möguleika stafrænnar tækni til að auka gagnvirkni og dýpka upplifunina.  Jafnframt er unnið í leiðum til að nýta sýndarheiminn í kennslu og þróa nýjar aðferðir til að komast nær viðfangsefni sýningarinnar.

Harpa, tónlistar- og ráðstefnuhús 

Við erum að smíða stafrænt þrívíddarumhverfi af Hörpu sem gerir fólki kleift að ganga um og upplifa bygginguna á nýjan hátt.

Harpa er einstakt mannvirki, þekkt fyrir arkitektúr sinn og birtuspilið í glerhjúpnum. Með stafrænu líkani er hægt að skoða húsið í mismunandi birtuskilyrðum og sjá hvernig hönnunin breytist eftir tíma dags og árstíðum.

Auðvelt er að setja inn og færa til hluti, hanna rými og stilla lýsingu.